குமரி அருகே, ஆசிரியர்கள் அடித்து துன்புறுத்தியதாக கூறி மகன்களை பள்ளிக்கு அனுப்பாமல் 4 ஆண்டுகளாக தாய், வீட்டிலேயே பூட்டி வைத்திருந்தது குறித்து போலீசார் விசாரித்து வருகின்றனர்.
இரணியலைச் சேர்ந்த முருகன் - பிரேமா தம்பதிக்கு 3 மகன்கள் உள்ள நிலையில், முருகன் கேரளாவில் பணிபுரிந்து வருகிறார். பிரேமா தனது மகன்களை 4 ஆண்டுகளாக வீட்டிற்குள் பூட்டி வைத்துள்ளதாக கிடைத்த தகவலின் படி, குழந்தைகள் நல பாதுகாப்பு அதிகாரிகள் போலீசாருடன் அவரது வீட்டுக்கு சென்று விசாரித்தனர்.
அப்போது, 4 ஆண்டுகளுக்கு முன் பள்ளிக்கு சீருடை அணியாமல் சென்ற மகன்களை ஆசிரியர்கள் அடித்து துன்புறுத்தியதாகவும், அதனால் மகன்களை ஏதாவது செய்து விடுவார்கள் என்ற அச்சத்தில் பள்ளிக்கு அனுப்பவில்லை என்று கூறிய பிரேமா, அதிகாரிகளை வீட்டிற்குள் அனுமதிக்க மறுத்து வாக்குவாதத்தில் ஈடுபட்டார்.