டிராக்டர் மீது ரேஸ் பைக் மோதி விபத்து.. பைக் தீப்பிடித்து எரிந்ததில் வாகனம் ஓட்டி வந்த இளைஞர் தீயில் கருகி சம்பவ இடத்திலேயே பலி.!

நெல்லை மாவட்டம் நாங்குநேரி அருகே சாலையில் சென்று கொண்டிருந்த ரேஸ் பைக், முன்னால் சென்ற டிராக்டரை முந்திச்செல்ல முயன்ற போது அதன் மீதி மோதியதில், பைக் தூக்கி வீசப்பட்டு உடைந்து நொறுங்கி தீப்பிடித்து எரிந்தது.

இதில் பைக்கை ஓட்டி வந்த இளைஞர் சம்பவ இடத்திலேயே உடல் கருகி உயிரிழந்தார். நாகர்கோவிலை சேர்ந்த 25 வயதுடைய உதயா என்பவர் தனது டுகாட்டி ரேஸ் பைக்கில் ஏற்பட்டிருந்த சிறு பழுதை சரிசெய்ய, அதே பைக்கில் நெல்லைக்கு சென்றுள்ளார்.

வாகைகுளம் அருகே 4 வழிச்சாலை பாலம் அருகே அவர் சென்று கொண்டிருந்த போது முன்னால் சென்ற டிராக்டரை முந்த முயன்றதாக கூறப்படுகிறது.

அப்போது எதிர்பாராதவிதமாக டிராக்டர் மீது அவர் மோதியதில் விபத்து நேர்ந்ததாக சொல்லப்படும் நிலையில், டிராக்டர் ஓட்டுநர் அச்சமடைந்து உடனடியாக அங்கிருந்து தப்பிச்சென்றதாகவும் கூறப்படுகிறது.

தகவல் அறிந்து சென்ற நாங்குநேரி போலீசார் இளைஞரின் உடலை கைப்பற்றி பிரேத பரிசோதனைக்கு அனுப்பி வைத்து, தப்பிச்சென்ற டிராக்டர் ஓட்டுநரை தேடி வருகின்றனர்.