பண்ருட்டி அருகே காணாமல் போன 7 வயது சிறுமியை சிசிடிவி காட்சிகளின் உதவியுடன் 3 மணி நேரத்தில் காவல்துறையினர் மீட்டுள்ளனர்.
விழுப்புரம் மாவட்டம் திருவெண்ணைநல்லூரை சேர்ந்த ராஜேஸ்வரி என்ற சிறுமி சில நாட்களாக கடலூர் மாவட்டம் பண்ருட்டி அருகே திருவதிகையில் உள்ள பாட்டி வீட்டில் தங்கியுள்ளார்.
இந்நிலையில், இன்று காலை திடீரென சிறுமி மாயமான நிலையில், அது குறித்து காவல் நிலையத்தில் புகாரளிக்கப்பட்டது. இதனை தொடர்ந்து, பண்ருட்டி நகர பகுதியில் உள்ள சிசிடிவி காட்சிகளை ஆய்வு செய்ததில் அந்த சிறுமி கெடிலம் செல்லும் சாலையில் நடந்து சென்றது தெரியவந்தது.
இதனை அடுத்து, திருவதிகையிலிருந்து 7 கிலோ மீட்டர் தொலைவில் உள்ள மணப்பாக்கம் என்ற கிராமத்தில் அந்த சிறுமியை போலீசார் மீட்டனர். இது குறித்த விசாரணையில், தனது தாயின் ஞாபகம் வந்ததால் அவரை காண நடந்தே வீட்டை விட்டு சென்றதாக அச்சிறுமி தெரிவித்தார்.