எதிரில் நிற்பவரை ஆடையின்றி காட்டும் அதிசயக் கண்ணாடி இருப்பதாகக் கூறி ஒரு லட்ச ரூபாயை மோசடி செய்து தப்பியோடிய நபரை தேனி மாவட்ட போலீசார் தேடி வருகின்றனர்.
கும்பகோணத்தைச் சேர்ந்த யுவராஜ் என்பவருக்கு அவரது நண்பர் ஒருவர் மூலமாக தேனி மாவட்டம் உப்புக்கோட்டையைச் சேர்ந்த திவாகர், அரசகுமார் ஆகியோர் அறிமுகமாகியுள்ளனர். கண்ணில் அணிந்தால் எதிரில் நிற்பவரை ஆடையின்றி காண்பிக்கும் அதிசய கண்ணாடி தங்களிடம் இருப்பதாகவும் விலை ஒரு லட்ச ரூபாய் என்றும் கூறி, கருப்பு நிற கண்ணாடி ஒன்றின் புகைப்படத்தை யுவராஜுவுக்கு அனுப்பியுள்ளனர்.
அதனை நம்பி ஒரு லட்ச ரூபாய் பணத்தோடு, நண்பர்களுடன் தேனி சென்றுள்ளார் யுவராஜ். அரசகுமாரையும் திவாகரையும் சந்தித்து பணத்தைக் கொடுத்துவிட்டு கண்ணாடியைக் கேட்டவுடன், இருவரும் பணத்துடன் ஓட்டம் பிடித்துள்ளனர். அவர்களில் அரசகுமார் மட்டும் சிக்கிவிட, திவாகர் பணத்துடன் தலைமறைவாகிவிட்டான்.