தமிழகத்தில் ஒரு நாள் கொரோனா பாதிப்பு, 36 ஆயிரத்தைத் தாண்டி உள்ளது. இதுவரை இல்லாத அளவாக கடந்த 24 மணி நேரத்தில், 467 பேர் கொரோனாவுக்கு பலியாகி உள்ளனர்.
தமிழகத்தில் ஒரே நாளில் 36 ஆயிரத்து 184 பேருக்கு கொரோனா வைரஸ் தொற்று உறுதி ஆகி உள்ளது. பெருந்தொற்று பாதிப்பிலிருந்து, 24ஆயிரத்து 478 பேர் குணமடைந்து வீடு திரும்பியுள்ளனர்.
கடந்த 24 மணி நேரத்தில், 22 வயது மதுரை இளம்பெண், 24 வயது திண்டுக்கல் இளம் பெண் மற்றும் மதுரை, தஞ்சாவூர், ராணிப்பேட்டை, நாமக்கல் ஆகிய மாவட்டங்களில் 25 வயது இளம்பெண்கள் கொரோனாவுக்கு பலியானார்கள்.
இதுதவிர, 95 வயது முதியவர், 97 வயது மற்றொரு முதியவர் உள்பட சென்னை நகரில் மட்டும் ஒரே நாளில் 109 பேர், கொரோனாவால் உயிரிழந்தனர், தமிழகம் முழுவதும் ஒரே நாளில் மட்டும் இதுவரை இல்லாத வகையில் உயிரிழப்பு 467 ஆக உயர்ந்துள்ளது.
சென்னையில் புதிதாக 5,913 பேருக்கு கொரோனா பாதிப்பு உறுதி செய்யப்பட்டு உள்ளது. கோவையில் 3,243 பேரும் செங்கல்பட்டில் 2,226 பேரும் வைரஸ் தொற்றால் பாதிக்கப்பட்டு உள்ளனர்.
திருப்பூர் - 1,796, திருவள்ளூர் - 1667, ஈரோடு - 1,656 , மதுரை - 1,355 திருச்சி - 1,331 , கன்னியாகுமரி -1251 மற்றும் காஞ்சிபுரத்தில் 1145 பேருக்கும் வைரஸ் தொற்று உறுதி செய்யப்பட்டு உள்ளது.
கடந்த 24 மணி நேரத்தில், 12 வயதுக்கு உட்பட்ட சிறுவர் - சிறுமிகள், 1052 பேருக்கு வைரஸ் தொற்று உறுதி ஆகி உள்ளது. மாநிலம் முழுவதும் 2,74,629 பேர், கொரோனாவுக்கு சிகிச்சை பெற்று வருவதாக தமிழக சுகாதாரத்துறை தெரிவித்துள்ளது.