சென்னை உயர் நீதிமன்றம் மற்றும் உயர் நீதிமன்ற மதுரைக் கிளையில் நாளை முதல் ஆன்லைன் மூலம் மட்டுமே விசாரணை - தலைமைப் பதிவாளர்

சென்னை உயர் நீதிமன்றம் மற்றும் உயர் நீதிமன்ற மதுரைக் கிளையில் வரும் சனிக்கிழமை முதல் ஆன்லைன் மூலம் மட்டுமே வழக்கு விசாரணை நடைபெறும் என்று தலைமைப் பதிவாளர்  ப.தனபால், அறிவித்துள்ளார்.

இதுகுறித்து அவர் விடுத்துள்ள அறிக்கையில்,  முக்கிய வழக்குகள் மற்றும் ஜாமீன் வழக்குகளில் மட்டும் அரசு வழக்கறிஞர்கள் நேரடியாக ஆஜராக வேண்டுமென கூறப்பட்டுள்ளது.

உயர் நீதிமன்றத்தின் மற்ற அனைத்து வழக்குகளின் விசாரணையும் அடுத்தகட்ட அறிவிப்பு வரும் வரை ஆன்லைன் மூலம் மட்டுமே நடைபெறும் என்று கூறப்பட்டுள்ளது.

வழக்கறிஞர் அறைகள் மற்றும் நூலகங்கள் வருகிற17 ஆம் தேதி முதல் மூடப்படும் என்றும், இந்த அறிவிப்பு உயர் நீதிமன்ற மதுரைக் கிளைக்கும் பொருந்தும் என்றும் தெரிவிக்கப்பட்டுள்ளது.