தூத்துக்குடி மாவட்டம் தருவைகுளத்தில் கடலோரத்தில் நிறுத்தி வைக்கப்பட்டிருந்த விசைப்படகில் சமையல் சிலிண்டர் வெடித்து பயங்கர தீ விபத்து ஏற்பட்டது.
அந்தோனிராஜ் என்பவருக்கு சொந்தமான விசைப்படகில், மீனவர்கள் சமையல் செய்து கொண்டிருந்தனர். அப்போது, எதிர்பாராதவிதமாக சிலிண்டர் வெடித்து படகில் தீ விபத்து ஏற்பட்டது.
மற்ற படகுகளுக்கு தீ பரவாமல் தடுக்க தீ பிடித்த படகை இயக்கி கடலுக்குள் மீனவர்கள் தள்ளிவிட்டனர்.
இருப்பினும், காற்றின் வேகத்தில் மளமளவென பரவிய தீ, அருகே ஐஸ் கட்டி இறக்குவதற்காக நின்று கொண்டிருந்த லாரி மீதும் பற்றியது.
தகவல் அறிந்து வந்த தீயணைப்புத்துறையினர் வெகு நேரம் போராடி தீயை அணைத்தனர். படகின் பெரும்பகுதி தீயில் கருகியது.