ரோந்து போலீசாரின் வாக்கி டாக்கியை பறித்து.. சிதறு தேங்காய் போல உடைத்த ஆசாமி கைது..!

ராணிப்பேட்டை மாவட்டம் அரக்கோணத்தில் ரோந்து போலீசாரின் வாக்கி டாக்கியை பறித்து சாலையில் சிதறு தேங்காய் போன்று உடைத்த ஆசாமியை போலீசார் கைது செய்தனர்.

விண்டர்பேட்டை பகுதியில் அரைகுறை ஆடையுடன் மனநலம் பாதிக்கப்பட்டவர் போல் ஒருவர் சுற்றித்திரிவதாக கிடைத்த தகவலின் பேரில், ரோந்து பணியில் ஈடுபட்டிருந்த காவலர் சதீஷ் சம்பவ இடத்திற்கு சென்று விசாரணை நடத்தியுள்ளார். இதனை நோட்டமிட்ட அந்த நபர், காவலரை வழிமறித்து சண்டையிட்டு வாக்கி டாக்கியை பறித்ததோடு மட்டுமில்லாமல், அதனை நடு ரோட்டில் வைத்து ஆவேசமாக சிதறு தேங்காய் போல் உடைத்து நொறுக்கினார்.

இந்த வீடியோ வைரலான நிலையில், காவலரின் வாக்கி டாக்கியை பறித்து உடைத்த பூங்காவனம் என்பவனை கைது செய்த போலீசார், அவனை சென்னையில் உள்ள மனநல மருத்துவமனையில் அனுமதித்துள்ளனர்.

பூங்காவனம் மீது திருட்டு, வழிப்பறி உள்ளிட்ட பல்வேறு குற்றவழக்குகள் நிலுவையில் உள்ள நிலையில், அதில் இருந்து தப்பித்துக்கொள்ள மனநலம் பாதிக்கப்பட்டவர் போல் நடிப்பதாக கூறப்படுகின்றது. இதனிடையே, பணியின் போது கவனக்குறைவாக செயல்பட்டு வாக்கி டாக்கியை பறிகொடுத்ததாக காவலர் சதீஷிடமும் விளக்கம் கேட்டு விசாரணை நடைபெறுவதாக சொல்லப்படுகின்றது.